Abul.org
Association Bordelaise des Utilisateurs de Logiciels libres
Devisada mesadèra de Ràdio Paìs
DEVISADA de Ràdio País – Divendres, lo 31 d’octòbre de 2008
Taulèr deu gat – Cafè Gascon
« Dempèi l’emancipacion de la musica trad occitana dincas aus logiciaus libres : trenta ans de surfing au dessús deus corrents comerciaus. »
Qu’ei la tematica de la Devisada mesadèra de Ràdio País qui se debana a Aush au Cafè Gascon deu Geors Nosella lo divès 31 d’octòbre de 2008
Ende neurir aqueste debat Joan-Marc Sutto que recep suu « Taulèr deu gat » Maryse Brumas e Jacques Zamo.
Maryse Brumas que participèc a Agen a la basuda deu moviment Trad occitan o gascon, ende èster mei precís, dambe los Perlinpinpin Folk. Estrambordats per la musica folk, aquestes joens que se sabón despartir d’aqueth univers tà cercar ua musica country d’entà-n-eres. Que seràn moments extrordinaris : encontres dambe musicaires e dançaires vielhs, la renavida de la boha dambe l’Alain Cadeillan, la fabricacion d’instruments, l’aprentissatge deu vriolon au talhèr dambe Christian Lanau, lo collectatge de cantas de danças e ne passi ! Un monde en ebullicion qui s’alanderà sus ua respelida de las nòstas musicas dambe concèrts aus quate caires deu planeta. En seguir aquesta aventura que nescón tanben gropes coma : Atal, l’APCA, Ténarèze, Cap Negre, Gasconha Plus...
Tanben informaticiana (analista-programaira), non se cau donc pas estonar de véser Maryse Brumas auèi costejar d’autes resistents a las tendencias comerciaus : los utilizators de logiciaus libres. Au son costat, Jacques Zamo, qui estèc jornalista e cap d ’agencia d’un setmanèr despartamentau, a l’origina d’ua cronica en gascon e de la reedicion d’un « Armanac de la Gasconha 2006 », eth qu’ei auèi lo dinerèr de la seccion despartamentau de l’I.E.O. E utilizator, un de mes, de logiciaus libres. Que nos assabenta de la sua experiencia de « client » de mei d’ua mena d’utisses informatics. Que cau enfin mentàver la participacion preciosa de Yann Crom acostumat aus sistèmis Linux.
Aquesta Devisada libertària, musicau e informatica que serà difusada sus las ondas de Ràdio País (89.8 Bearn, 101.5 Bigòrra, 90.8 e 98.0 Gèrs, 103.6 Shalòssa o sus la tela : www.radio-pais.com)